ധീരത കാട്ടിയ കുട്ടികൾക്ക് അരയി ഗ്രാമത്തിന്റെ അവാർഡ്.

ധീരത കാട്ടിയ കുട്ടികൾക്ക് അരയി ഗ്രാമത്തിന്റെ അവാർഡ്.

അച്ചാംതുരുത്തിയിലെ ആകാശ്, അക്ഷയ്, ജിതിൻ ബാബു എന്നീ കുട്ടികളെയാണ് അധ്യാപക ദിനത്തിൽ ആദരിച്ചത്
പാഠപുസ്തകങ്ങളിൽ നിന്ന് സ്വന്തമാക്കിയ സ്നേഹത്തിന്റെ നല്ല പാഠം ജീവിതത്തിൽ പ്രവർത്തിച്ചു കാണിച്ച കുട്ടികളെ  അരയി ഗ്രാമം  ധീരതയ്ക്കുള്ള അവാർഡ് നൽകി ആദരിച്ചു. മികച്ച അധ്യാപകർ രാഷ്ട്രപതിയിൽ നിന്ന് അവാർഡ് സ്വീകരിക്കുന്ന സമയത്തു തന്നെയാണ്  കുട്ടികൾക്കും മുതിർന്നവർക്കും മനുഷ്യത്വത്തിന്റെ ജൈവ പാഠം പകർന്ന  മൂന്നു ബാലാധ്യാപകരെ വിദ്യാലയത്തിലേക്ക് വിളിച്ചു വരുത്തി അരയി ഗവ.യു.പി. സ്കൂൾ  അനുമോദിച്ചത്.

കുളത്തിന്റെ ആഴങ്ങളിലേക്ക് മുങ്ങിത്താഴുന്ന നാലാം ക്ലാസുകാരനായ ഹേമന്തിനെ  രക്ഷപ്പെടുത്തിയതിലൂടെയാണ് അച്ചാംതുരുത്തി രാജാസ് എ.യു.പി.സ്കൂളിലെ അഞ്ചാം ക്ലാസുകാരൻ ആകാശ്, ആറാം ക്ലാസുകാരൻ, അക്ഷയ്, ഏഴാം ക്ലാസുകാരൻ ജിതിൻ ബാബു എന്നീ കുട്ടികൾ നാടിന്റെ സ്നേഹഭാജനങ്ങളായത്.കാരി എ .എൽ .പി സ്കൂൾ വിദ്യാർഥികളായ ആരോമലും ഹേമന്തും കുളത്തിൽ നീന്തി കളിക്കുന്നതിനിടയിൽ ഹേമന്തിനെ പെട്ടെന്ന് കാണാതാവുകയായിരുന്നു. ഒന്നാം ക്ലാസുകാരനായ  ആരോമലിന്റെ നിലവിളി കേട്ട് ദൈവദൂതരെ പോലെ ഓടി എത്തിയ മൂവരും കുമിള കണ്ട ഭാഗത്തേക്ക് എടുത്തു ചാടുകയായിരുന്നു. ഹേമന്തിന്റെ തലമുടിയിൽ ബലമായി പിടിച്ച് കരക്ക് എത്തിച്ചതിനു ശേഷം കുട്ടികൾ തന്നെ കൃത്രിമ ശ്വാസവും പ്രഥമ ശുശ്രൂഷയും നൽകിയ ശേഷമാണ് നാട്ടുകാരെത്തി ആശുപത്രിയിൽ കൊണ്ടു പോകുന്നത്.
അരയി ഗവ.യു.പി.സ്കൂളിൽ ഒരുക്കിയ കളർ ചോക്ക് എന്ന പരിപാടിയിലാണ് അപൂർവമായ ധീരതയിലൂടെ നാടിന് മാതൃകയായ കുട്ടികൾക്ക് പുരസ്കാരം നൽകിയത്.പ്രശസ്ത നിരൂപകനും കക്കാട്ട് ഗവ.ഹൈസ്കൂൾ പ്രഥമാധ്യാപകനുമായ ഇ.പി.രാജഗോപാലൻ ഉദ്ഘാടനം ചെയ്തു. പി.ടി.എ പ്രസിഡണ്ട് പി.രാജൻ അധ്യക്ഷത വഹിച്ചു. നഗരസഭാ കൗൺസിലർ സി.കെ. വത്സലൻ കുട്ടികൾക്ക് അവാർഡ് വിതരണം ചെയ്തു. പ്രഥമാധ്യാപകനും ദേശീയ അവാർഡ് ജേതാവുമായ കൊടക്കാട് നാരായണൻ കുട്ടികളെ പരിചയപ്പെടുത്തി.പ്രകാശൻ കരിവെള്ളൂർ, ശോഭന കൊഴുമ്മൽ പ്രസംഗിച്ചു.  ജില്ലാതല പുരസ്കാരം നേടിയ അഭിരാം, നീലിമ എന്നിവരെ അനുമോദിച്ചു. മൃദുല സ്കൂൾ ലൈബ്രറിയിലേക്ക്  പിറന്നാൾ പുസ്തകം നൽകി.മിഥുൻ രാജ്, ആദിത്യൻ, നീലിമ എന്നിവർ അധ്യാപക കഥകൾ അവതരിപ്പിച്ചു. സുനിമോൾ രചനയും കെ.വി.സൈജു സംഗീതവും നിർവഹിച്ച ഗുരു വന്ദനം ഗോപിക, ദേവിക,അഭിരാമി, അമേയ എന്നീ കുട്ടികൾ ആലപിച്ചു.

അരയി ഗവ.യു. പി.സ്കൂൾ ഒരുമയിലൂടെ മുന്നോട്ട്

ഇന്ന് അധ്യാപക ദിനം
"മരണത്തിന് അവധി നൽകരുത്. പകരം കൂടുതൽ സമയം പ്രവർത്തിക്കണം". മഹാനായ എ.പി.ജെ.അബ്ദുൾ കലാമിന്റെ വാക്കുകൾ നടപ്പിലാക്കുന്നത് ഒരു ദിവസമല്ല. ഒരു വർഷം മുഴുവനും! അധ്യാപകർ ഒരു കുടുംബത്തിലെ പോലെ സ്നേഹത്തോടെ യും ഒരുമയോടെയും കഴിയുന്ന വിദ്യാലയങ്ങൾക്കേ ഇത്തരം സ്വപ്നം കാണാനും യാഥാർഥ്യമാക്കാനും കഴിയൂ. അവഗണിക്കപ്പെട്ട അരയി ഗവ.യു.പി.സ്കൂളിനെ രണ്ടു വർഷം കൊണ്ട് സംസ്ഥാനത്തെ തന്നെ മികച്ച വിദ്യാലയമാക്കി മാറ്റിയതിനു പിന്നിൽ ഈ കൂട്ടായ്മയാണ്. അധ്യാപകരിലെ ഈ അപൂർവ കൂട്ടായ്മ രക്ഷിതാക്കളും നാട്ടുകാരും ഏറ്റെടുത്തു. "അരയി : ഒരുമയുടെ തിരുമധുരം " വിജയം കണ്ടു. നൂറിൽ താഴെ മാത്രം കുട്ടികളുണ്ടായിരുന്ന വിദ്യാലയത്തിലെ കുട്ടികളുടെ എണ്ണം രണ്ടു വർഷം കൊണ്ട് ഇരട്ടിയലധികമായി . കാഞ്ഞങ്ങാട് നഗരസഭ വരുന്ന അഞ്ചു വർഷം കൊണ്ട് വിദ്യാലയത്തെ അന്താരാഷ്ട്ര നിലവാരത്തിലേക്ക് ഉയർത്തും.
രാവിലെ 9 മണിക്ക് മണി മുഴങ്ങുമ്പോൾ തന്നെ അധ്യാപകരും കുട്ടികളും റെഡി. കുട്ടികളുടെ റേഡിയോ അരയി വാണിയോടെയാണ് തുടക്കം. കൊച്ചുവാർത്തകൾ, കുഞ്ഞിച്ചിറകുകൾ, കിളിമൊഴി ... എല്ലാ പരിപാടികളും നിശ്ചയിക്കുന്നതും അവതരിപ്പിക്കുന്നതും കുട്ടികൾ തന്നെ. അതിനായി ഒരു കുഞ്ഞു എഡിറ്റോറിയൽ ബോഡ് തന്നെയുണ്ട് അവർക്ക് .
എല്ലാ കാര്യത്തിലും ഒരുമയോടെ നീങ്ങുന്ന അധ്യാപകർക്കിടയിൽ ഒരു കാര്യത്തിൽ മാത്രം കടുത്ത മത്സരമുണ്ട്. അത് തങ്ങളുടെ ക്ലാസ് മുറിയിൽ ഏറ്റവും മികച്ച പഠനപ്രവർത്തനങ്ങൾ ആസൂത്രണം ചെയ്യുന്നതിലും നടപ്പിലാക്കുന്നതിലും മാത്രം.
ക്ലാസിൽ നടക്കുന്ന കാര്യങ്ങൾ തത്സമയം രക്ഷിതാക്കളെ അറിയിക്കാൻ രക്ഷിതാക്കളുടെ വാട്ട്സ് അപ് കൂട്ടായ്മയുമുണ്ട്. അധ്യാപകർക്ക് കുട്ടികളുടെ ഗൃഹപാഠങ്ങൾ മോണിറ്റർ ചെയ്യാനും  ഈ സ്മാർട്ട് ഫോൺ കൂട്ടായ്മയിലൂടെ കഴിയുന്നു.  മികച്ച പഠന നിലവാരത്തിനുള്ള സ്റ്റേറ്റ് എക്സലൻസി അവാർഡ്  കഴിഞ്ഞ വർഷം  ലഭിച്ചത് അരയി സ്കൂളിനായിരുന്നു.
പഠന പ്രവർത്തനങ്ങളിൽ വേറിട്ട മാതൃക സൃഷ്ടിച്ച അരയി ജൈവ കൃഷിയിലും നൂറുമേനി കൊയ്തു.കഴിഞ്ഞ വർഷം ജില്ലാതലത്തിൽ ഒന്നാം സ്ഥാനം വിദ്യാലയത്തെ തേടിയെത്തി. വിഷമില്ലാത്ത പച്ചക്കറികൾ കൊണ്ട് വിഭവസമൃദ്ധമായ ഉച്ചയൂണ് - അരയി നടപ്പിലാക്കുന്നത് ഇങ്ങനെയാണ്. വിദ്യാലയം സന്ദർശിച്ച നൂറിലേറെ പ്രഥമാധ്യാപകരും പിടിഎ ഭാരവാഹികളും ഉച്ചഭക്ഷണ മെനു കണ്ട് അന്തം വിട്ടു .ദിവസവും മൂന്നും നാലും കറികൾ.ആഴ്ചയിൽ ഒരു ദിവസം സ്പെഷൽ പായസം. പിറന്നാൾ സദ്യ വേറെയും. തറവാടുകളും രക്ഷിതാക്കളും വിദ്യാലയത്തിലേക്ക് നാടൻ വിഭവങ്ങൾ എത്തിക്കാൻ മത്സരത്തിലാണ്. പാചകത്തിനുമുണ്ട് അമ്മമാരുടെ കൂട്ടായ്മ.
തീർന്നില്ല അരയി വിശേഷം. ദിനാചരണങ്ങളും മേളകളും തുടങ്ങി വിദ്യാലയത്തിലെ എല്ലാ പരിപാടികളിലും ജനപങ്കാളിത്തം കാണാം. കഴിഞ്ഞ വർഷത്തെ ദേശീയ അധ്യാപക അവാർഡ് കൊടക്കാട് നാരായണൻ പ്രഥമാധ്യാപകനായി എത്തിയതോടെയാണ് അരയിയുടെ ശനിദശ മാറിയത്.മികച്ച പി.ടി.എ യ്ക്ക് ജില്ലാതലത്തിൽ ഒന്നാം സ്ഥാനം, സമഗ്ര വിദ്യാഭ്യാസ പദ്ധതിക്ക്  ജില്ലാതല പുരസ്കാരം, മികച്ച ബ്ലോഗിനുള്ള പുരസ്കാരം,സീഡ്, വണ്ടർലാന്റ് പുരസ്കാരം :.. അരയിയിലേക്ക് സമ്മാനങ്ങളുടെ പെരുമഴ തന്നെയായിരുന്നു. ശോഭനകൊഴുമ്മൽ, കെ.വനജ, പ്രകാശൻ കരിവെള്ളൂർ, കെ.വി.സൈജു, എ.വി.ഹേമാവതി, പി.ബിന്ദു, സിനി എബ്രഹാം, കെ.ശ്രീജ, ടി..ഷീബ, ടി.വി.സവിത, ടി.വി.രസ്ന എന്നിവരാണ് അധ്യാപകർ.കെ.അനിതയാണ് ഓഫീസ് അറ്റൻഡർ.പി.രാജൻ പി.ടി.എ. പ്രസിഡന്റ്, എസ്.സി.റഹ്മത്ത് മദർ പിടിഎ പ്രസിഡന്റ്.കെ.അമ്പാടി ചെയർമാനായി വികസന സമിതിയുമുണ്ട്.
അരയി ഗവ.യു. പി.സ്കൂൾ ഒരുമയിലൂടെ മുന്നോട്ട്

അധ്യാപകരെ ആദരിക്കാൻ അരയി സ്കൂളിൽ കളർ ചോക്ക്

അധ്യാപകരെ ആദരിക്കാൻ അരയി സ്കൂളിൽ കളർ ചോക്ക്
അറിവിന്റെ നിറ വെളിച്ചം പകർന്ന് തലമുറകളെ വിജ്ഞാനത്തിലേക്ക് കൈപിടിച്ചുയർത്തിയ അധ്യാപകരെ ആദരിക്കാൻ അരയി ഗവ.യു.പി.സ്കൂളിൽ "കളർ ചോക്ക് "പരിപാടി.

സെപ്തംബർ 5ന് അധ്യാപക ദിനത്തിൽ നടക്കുന്ന പരിപാടി പ്രശസ്ത നിരൂപകനും കക്കാട്ട് ഗവ.ഹൈസ്കൂൾ പ്രഥമാധ്യാപകനുമായ ഇ.പി..രാജഗോപാലൻ ഉദ്ഘാടനം ചെയ്യും. വെള്ളത്തിൽ വീണ കുട്ടിയെ കരയ്ക്ക്  എത്തിച്ച് കൃത്രിമ ശ്വാസോഛ്വാസം നൽകി ജീവൻ രക്ഷിച്ചതിലൂടെ  മനുഷ്യത്വത്തിന്റെ നല്ല പാഠം പകർന്ന അച്ചാംതുരുത്തി രാജാസ് എ യു പി.സ്കൂൾ വിദ്യാർഥികളായ ജിതിൻ ബാബു, അക്ഷയ്, ആകാശ് , ജില്ലാതലത്തിൽ ഒന്നാം സമ്മാനം നേടിയ അഭിരാം (തൈക്കോൺഡോ) നീലിമ(ചിത്രരചന) എന്നിവരെ അനുമോദിക്കും. ഗുരു സ്മൃതി, ഗുരു വന്ദനം പരിപാടിയുമുണ്ടായിരിക്കും.

പച്ചക്കറി വിളവെടുത്തു.

അരയി സ്കൂളിൽ പച്ചക്കറി വിളവെടുത്തു

നാടൻ വിഭവങ്ങളുപയോഗിച്ച് കുട്ടികൾക്ക്‌ പോഷക സമൃദ്ധമായ ഉച്ചഭക്ഷണം നൽകുന്നതിലൂടെ സംസ്ഥാനത്തു തന്നെ ശ്രദ്ധേമായ അരയി ഗവ.യു.പി.സ്കൂളിൽ വർഷകാല ജൈവ പച്ചക്കറി വിളവെടുപ്പ് നടത്തി.സ്കൂൾ ഫാർമേഴ്സ് ക്ലബ്ബിന്റെ നേതൃത്വത്തിൽ മുപ്പതോളം കുട്ടി കർഷകരുടെ നേതൃത്വത്തിൽ ഗ്രോബാഗിൽ വെണ്ട, പയർ, വഴുതിന, നരമ്പൻ, കക്കിരി എന്നിവയാണ്   കൃഷി ചെയ്തത്.കഴിഞ്ഞ വർഷം  സ്കൂൾ പച്ചക്കറി കൃഷിക്കുള്ള ജില്ലാതല പുരസ്കാരം ലഭിച്ചിരുന്നു. കൃഷി വകുപ്പ് വിതരണം ചെയ്ത വിത്തുകൾ ഉപയോഗിച്ച് കുട്ടികൾ വീട്ടുമുറ്റത്തും പച്ചക്കറി കൃഷി ആരംഭിച്ചിട്ടുണ്ട്.

ഒന്നാം സ്ഥാനം

 ഹൊസ്ദുർഗ് ഉപജില്ലാ തല തൈക്കോൺഡ (25 കിലോഗ്രാമിനു താഴെ) മത്സരത്തിൽലും,ജില്ലാതല മത്സരത്തിലും ഒന്നാം സ്ഥാനം നേടിയ ഏഴാം തരം വിദ്യാർഥി അഭിരാം (ഗവ.യു.പി സ്കൂൾ അരയി)

ഉച്ചഭക്ഷണം വിഭവ സമൃദ്ധം

അരയി സ്കൂളിലേക്ക് പൂക്കാട്ടിൽ തറവാട്ടിൽ നിന്നും നാടൻ വിഭവങ്ങൾ

അരയി സ്കൂളിലെ ഉച്ചഭക്ഷണം വിഭവ സമൃദ്ധമാക്കാൻ പൂക്കാട്ടിൽ തറവാട്ടിൽ നിന്നും നാടൻ വിഭവങ്ങളെത്തി.കഴിഞ്ഞ മാസം മണക്കാട് തറവാട്  ഒന്നര ക്വിൻറലിലധികം മത്തൻ വിദ്യാലയത്തിലേക്ക് സൗജന്യമായി നൽകിയിരുന്നു.  തറവാട്ട് കളിയാട്ടത്തിനു സമാഹരിച്ച വിഭവങ്ങളിൽ മിച്ചം വന്ന മത്തനും കുമ്പളങ്ങയുമാണ് സ്കൂളിലെത്തിച്ചത്. നഗരസഭാ കൗൺസിലർ സി.കെ.വത്സലൻ, പി.ടി.എ പ്രസിഡന്റ് പി.രാജൻ, പി.ഭാസ്ക്കരൻ, രമേശൻ അരയി, പ്രഥമാധ്യാപകൻ കൊടക്കാട് നാരായണൻ, സ്കൂൾ ലീഡർ പി.മിഥുൻ രാജ് എന്നിവർ ഏറ്റു വാങ്ങി.

സമ്മാനം കൊണ്ട് യുറീക്കാ വായനശാല :

സമ്മാനം കൊണ്ട് യുറീക്കാ വായനശാല :

നീലിമ മോൾ മാതൃകയായി
സമ്മാനമായി ലഭിച്ച തുക കൊണ്ട് സ്വന്തം വിദ്യാലയത്തിൽ യുറീക്ക വായനശാല
തുറന്ന് അഞ്ചാം തരം വിദ്യാർഥിനി മാതൃകയായി. അരയി ഗവ.യു.പി.സ്കൂളിലെ നീലിമയാണ്
ജില്ലാതല ചിത്രരചനാ മത്സരത്തിൽ തനിക്ക് കിട്ടിയ ക്യാഷ് അവാർഡ് വിദ്യാലയത്തിലെ
ഒന്ന് തൊട്ട് ഏഴു വരെയുള്ള മുഴുവൻ കുട്ടികൾ ക്കും അറിവു പകരാനുള്ള വേറിട്ട
പദ്ധതിക്ക് വിനിയോഗിച്ചത്. കേരള ശാസ്ത സാഹിത്യ പരിഷത്തിന്റെ നേതൃത്വത്തിൽ നാലര
പതിറ്റാണ്ടായി മുടങ്ങാതെ പ്രസിദ്ധീകരിക്കുന്ന ഏഷ്യയിലെ തന്നെ ഏറ്റവും
പ്രചാരമുള്ള ബാലശാസ്ത്ര  മാസികയാണ് യുറീക്ക.സൂക്ഷ്മജീവികളെ കുറിച്ചുള്ള
പ്രത്യേക പതിപ്പുൾപ്പെടെ ഒരു വർഷം മുഴുവനും ക്ലാസുകളിൽ യുറീക്ക
എത്തിക്കുന്നതിനുള്ള വാർഷിക വരിസംഖ്യ  സ്കൂളിൽ നടന്ന ചടങ്ങിൽ ശാസത്രകേരളം
പത്രാധിപ സമിതിയംഗം പ്രൊഫ.എം.ഗോപാലൻ നീലിമയിൽ നിന്ന് ഏറ്റുവാങ്ങി.

കനലോര്‍മ്മ...

കനലോര്‍മ്മ

 "മുത്തച്ഛാ ഞങ്ങളുണ്ട് കൂടെ " സമര ചരിത്രത്തിന് അരങ്ങൊരുക്കി അരയി
കത്തിയെരിയുന്ന വർത്തമാന ഭാരതത്തിന്റെ നെരിപ്പോടിനരികിലിരുന്ന്, ഗാന്ധിജിയുടെ ചിത്രത്തിൽ നോക്കി സ്വാതന്ത്ര്യ സമര സേനാനിയായ വൃദ്ധൻ വിലപിക്കുന്നു '
"മഹാത്മാവേ, അങ്ങിത് കാണുന്നില്ലേ? " വംശീയസംഘർഷങ്ങളും ഹൈടെക് കവർച്ചകളും കലാപങ്ങളും കൂട്ടക്കൊലകളും നിറഞ്ഞു നിൽക്കുന്ന ചാനൽ കാഴ്ചകളിൽ മനം നൊന്ത് ആ വൃദ്ധന്റെ മനസ്സ് ജാലിയൻ വാലാബാഗിന്റെ രുധിരസ്മൃതികളിലേക്ക് പടരുകയാണ്.
ഇന്ത്യാ ചരിത്രത്തിൽ ബ്രിട്ടീഷുകാർ നടത്തിയ ജാലിയൻ വാലാബാഗ് കൂട്ടക്കുരുതിക്ക് വർത്തമാനകാല സംഭവങ്ങളുടെ പശ്ചാത്തലത്തിലാണ് കുരുന്നു പ്രതിഭകൾ ദൃശ്യാഖ്യാനം ഒരുക്കിയത്.ചരിത്ര പുരുഷന്മാരായ ഗാന്ധിജി,സെയ്ഫുദ്ദീൻ കിച്ചുലു ,ഭഗത് സിംഗ്, എന്നിവർ കഥാപാത്രങ്ങളായി രംഗത്തെത്തി, ബ്രിട്ടീഷ് പോലിസ് മേധാവിയായ ജനറൽ ഡയറും. ജ്വലിക്കുന്ന സ്മൃതികൾക്കു നടുവിൽ പുതിയ കാലത്തെക്കുറിച്ചുള്ള ആധിയുമായി ഒറ്റപ്പെട്ടു പോകുന്ന വൃദ്ധനെ ഇളം തലമുറയുടെ പ്രതീകമായി ഒരു സംഘം വിദ്യാർഥികൾ സാന്ത്വനത്തിന്റെ സ്നേഹവചസ്സുകളുമായി പൊതിയുകയാണ്.
സ്കൂൾ അങ്കണത്തെ മുഴുവൻ വേദിയാക്കിക്കൊണ്ട് സ്കുളിലെ മുഴുവൻ വിദ്യാർഥികളെയും കഥാപാത്രങ്ങളായി അണിനിരത്തി ക്കൊണ്ട് ഓപ്പൺ തീയേറ്ററിന്റെയും സംഗീതശില്പത്തിന്റെയും ഘടനയിലാണ് നാടകത്തിന്റെ അവതരണം. സ്കൂൾ അധ്യാപകരായ ശോഭന കൊഴുമ്മൽ രചനയും കെ.വി.സൈജു സംവിധാനവും നിർവഹിച്ചു.സംഗീതം ലോഹിതാക്ഷൻ രാവണേശ്വരം. പ്രകാശൻ കരിവെള്ളൂർ സർഗാത്മക പിന്തുണയേകി. വസ്ത്രാലങ്കാരം ദേവൻ ബാലൻ.പി.മിഥുൻ രാജ്, കെ.ആദിത്യൻ, പി.കെ.സ്നേഹ മോൾ, കെ.സിദ്ധാർഥ്, പി.കെ. ആദിത്യൻ, കെ.ആദർശ്, ബി.കെ.ആഷിഖ്, പി.ആകാശ്, കെ.അർജുൻ, പി.പി.അഭിരാം, കെ.അഫ്സത്ത്, എ.കാശിനാഥ്, ധനഞ്ജയൻ, കെ.ആദിഷ്, കെ.വി.ശ്രീനന്ദ് എന്നിവരാണ് പ്രധാന വേഷങ്ങളിൽ.പ്രഥമാധ്യാപകൻ കൊടക്കാട് നാരായണൻ, അധ്യാപകരായ സിനി എബ്രഹാം, എ.സുധീഷ്ണ, പി.ബിന്ദു, എ.വി. ഹേമാവതി, കെ.വനജ ,ടി.വി.സവിത, ടി. ഷീബ, കെ.ശ്രീജ, ടി.വി.രസ്ന എന്നിവർ പരിശീലനത്തിന് നേതൃത്വം നൽകി.സ്വാതന്ത്ര്യ ദിനാഘോഷത്തിന്റെ ഭാഗമായി അരയി ഗവ.യു.പി.സ്കൂൾ വിദ്യാർഥികൾ അവതരിപ്പിച്ച കനലോർമ്മ നാടകത്തിൽ നിന്ന്

"സ്വാശ്രയമെന്നത് സ്വാതന്ത്ര്യം .. ആശ്രിതരല്ലാ നാമാർക്കും "

സ്വയം നിർമ്മിച്ച പതാകയുമായി അരയി സ്കൂൾ കുട്ടികൾ
"സ്വാശ്രയമെന്നത് സ്വാതന്ത്ര്യം
                ആശ്രിതരല്ലാ നാമാർക്കും "
ദേശീയബോധമുണർത്തുന്ന ഒ.എൻ.വിയുടെ വരികൾ കർമപഥത്തിലെത്തിച്ച് അരയി ഗവ.യു.പി.സ്കൂൾ കുട്ടികൾ. സ്വാതന്ത്ര്യ ദിനത്തിൽ സംഘടിപ്പിക്കുന്ന റാലിയിൽ സ്വയം നിർമ്മിച്ച പതാകകളേന്തി പ്രീ - പ്രൈ മറി തൊട്ട് ഏഴു വരെ ക്ലാസുകളിലുള്ള 225 കുട്ടികളും അവരുടെ രക്ഷിതാക്കളും  അണി ചേരും.30 സെ.മീ. നീളവും 20 സെ.മീ. വീതിയുമുള്ള വെള്ളക്കടലാസിൽ ക്രയോൺ ഉപയോഗിച്ചാണ് പതാക തയ്യാറാക്കിയത്. രക്ഷിതാക്കൾക്കും കുട്ടികൾക്കും സ്വാതന്ത്ര്യ സമര പ്രശ്നോത്തരി, ദേശഭക്തിഗാനാലാപനം, സ്കൂൾ അധ്യാപിക ശോഭന കൊഴുമ്മൽ രചനയും കെ.വി.സൈജു രംഗാവിഷ്കാരവും നടത്തി മുഴുവൻ കുട്ടികളും അണി നിരക്കുന്ന ജാലിയൻ വാലാബാഗ് ഡോക്യു- ഡ്രാമ എന്നിവയും നടക്കും
  സ്വാതന്ത്യദിനാഘോഷത്തിന്റെ ഭാഗമായി അരയി ഗവ.യു.പി.സ്കൂൾ കുട്ടികൾ തയ്യാറാക്കിയ ദേശീയപതാക

വിഷമില്ലാത്ത ഓണസദ്യ

വിഷമില്ലാത്ത ഓണസദ്യ :അരയിയിലെ കുട്ടി കർഷകർ ഒരുക്കം തുടങ്ങി.
  ഓണസദ്യയ്ക്ക് വിഷമില്ലാത്ത പച്ചക്കറികൾ  കൊണ്ട് വിഭവങ്ങൾ ഒരുക്കാൻ അരയി സ്കൂൾ കുട്ടികൾ വീട്ടുമുറ്റത്ത് പച്ചക്കറിത്തോട്ടം ഒരുക്കും. കുട്ടികളുടെ അമ്മമാർ കുടുംബശ്രീയുടെ നേതൃത്വത്തിൽ ഇതിനകം തന്നെ മൂന്ന് സെന്റ് സ്ഥലത്ത് പച്ചക്കറി കൃഷി ആരംഭിച്ചിട്ടുണ്ട്. സ്കൂൾ ഹരിതസേനയുടെ നേതൃത്വത്തിൽ സ്കൂൾ മുറ്റത്ത് ആരംഭിച്ച ജൈവ പച്ചക്കറിയിൽ നിന്ന് ഒരാഴ്ചയ്ക്കകം വിളവെടുക്കാൻ കഴിയും.കൃഷി വകുപ്പ് നൽകിയ വിത്ത് പായ്ക്കറ്റിനോടൊപ്പം രക്ഷിതാക്കളുടെ അടുക്കളത്തോട്ടത്തിലെ വിത്തുകളും ഉപയോഗിച്ച് മത്സരാടിസ്ഥാനത്തിൽ കൃഷി ചെയ്യാനാണ് കുട്ടി കർഷകരുടെ തീരുമാനം.വിത്ത് പായ്ക്കറ്റ് വിതരണം സ്കൂൾ ലീഡർ പി.മിഥുൻരാജിന് നൽകി നഗരസഭാ കൗൺസിലർ സി.കെ. വത്സലൻ നിർവ്വഹിച്ചു. പ്രഥമാധ്യാപകൻ കൊടക്കാട് നാരായണൻ അധ്യക്ഷത വഹിച്ചു.

വീട്ടുമുറ്റ പച്ചക്കറി ത്തോട്ടത്തിനുള്ള വിത്തുകളുമായി അരയി ഗവ.യു.പി.സ്കൂൾ വിദ്യാർഥികൾ നഗരസഭാ കൗൺസിലർ സി.കെ.വത്സലനോടൊപ്പം