ആലസ്യത്തിന് 'അവധി' നല്‍കി അരയി ഗവ.യു.പി.സ്ക്കൂളില്‍ സ്നേഹാക്ഷര സംഗമം.
ആലസ്യത്തിന് 'അവധി' നല്‍കി അരയി ഗവ.യു.പി.സ്ക്കൂളില്‍ നടന്ന സ്നേഹാക്ഷര സംഗമം പരിപാടി കുട്ടികള്‍ക്കും മുതിര്‍ന്നവര്‍ക്കും നവ്യാനുഭവമായി.സാഹിത്യവും സംഗീതവും സമന്വയിപ്പിച്ചുകൊണ്ട് കേരള സാഹിത്യ അക്കാദമി മെമ്പറും പയ്യന്നൂര്‍ മലയാളഭാഷാ പാഠശാല ഡയറക്ടറുമായ ടി.പി. ഭാസ്ക്കരപൊതുവാളും, സീരിയല്‍ നടിയും പ്രൊഫഷണല്‍ ഗായികയുമായ സുമിത്രാരാജനും അവതരിപ്പിച്ച മധുരം മധുരം പരിപാടിയാണ് ഭാഷാസ്നേഹികള്‍ക്ക് നവ്യാനുഭവമായത്.
വേദിയിലെ നിലവിളക്കില്‍ അഞ്ചുകുട്ടികള്‍ചേര്‍ന്ന് അഞ്ചുതിരി തെളിയിച്ചതോടെ പരിപാടിക്ക് തുടക്കമായി.പ്രാചീനകവിതകള്‍തൊട്ട് ആധുനിക കാവ്യ ശകലങ്ങള്‍വരെ കോര്‍ത്തിണക്കികൊണ്ടുള്ള അവതരണം കഥാപ്രസംഗംപോലെ ലളിതവും നാടകം പോലെ ഹൃദ്യവുമായിരുന്നു.മൂന്ന് വര്‍ഷത്തിനിടയില്‍ തൊള്ളായിരം വേദികളിലവതരിപ്പിച്ച സാഹിത്യ വിരുന്ന് ആസ്വദിക്കാന്‍ നൂറുക്കണക്കിന് ആളുകള്‍ ഒത്തുകൂടി.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ